आर्थिक विवादमा परको चलचित्र निर्माता संघको नयाँ अध्यक्ष बन्ने तयारीमा छन् निर्माता तथा निर्देशक आकाश अधिकारी । फुटेर कहिल्यै उपलब्धी हात नपर्ने मान्यता राख्ने आकाश आगामी दिनमा सबै निर्मातालाई एकै छानामुनी ल्याउने दाबी गर्छन् । उनै निर्माता/निर्देशक अधिकारीलाई अनलाइनखबरले लगाएको पाँच आरोपः

१. एकथरि निर्माताले संघ नै छाडेर अर्को संघ खोलेको बेला तपाई निर्माता संघको अध्यक्ष हुन लाग्नु भयो । भूतले खाजा खाने बेलामा अध्यक्ष बन्न लाग्नु भो भन्छन् नि ?

जाे साथीहरुले नयाँ संघ खोल्नु भएको छ । उहाँहरुले चलचित्र उद्योगको हितकै लागि नयाँ संघ खोल्नु भएको हो । म पनि अध्यक्षको उम्मेदवार बन्न लागेको छु । मेरो पनि उद्देश्य उद्योग सुधार्ने नै हो । त्यसकारण त्यति अप्ठयारो हुन्छ जस्तो लाग्दैन । अर्को कुरा बिगतमा पनि निर्माता संघ दुइ वटा भएको थियो, मेरै प्रयासमा एक भएको हो । म अध्यक्ष भएँ भने एउटै छातामुनी बसेर काम गर्ने वातावरण मिलाउँछु । फुटेर कहिल्यै उपलब्धि हात पर्दैन ।

२. राजनितीमा आकषिर्त भएपछि चलचित्र निर्माणमा सुस्त हुनु भयो भन्छन् नि ?
पहिलो कुरा त म कुनै पद पाउँला भनेर राजनितीमा लागेको हैन । मात्रै नेपाली चलचित्र उद्योगको हित गरौं भनेर हो । मेरो गति रोकिएको छैन । मलाई एउटा चलचित्र पुरा गर्न २ वर्ष लाग्छ । आउँदो वर्ष दुइवटा चलचित्र गर्दैछु ।

३. नयाँ पुस्ताका निर्देशक तपाई भन्दा अघि भए भन्छन् नि ?
नेपाली चलचित्रलाई अन्तरराष्ट्रिय बजारमा लैजानु पर्छ भनेर वकालत गर्ने मैं हुँ । मेरा पनि केहि चलचित्र गएका छन् । युवा पुस्ताका धेरै चलचित्रले अन्तरराष्ट्रिय चर्चा पाए आफैंमा राम्रो हो । मेरो सबै चलचित्र विश्वबजारमा चल्नुपर्छ भन्ने होइन । नेपाली चलचित्र जानु आफैमा राम्रो हो ।

४. तपाईको चालढाल, बोलीचाली तन्नेरी पुस्ताको भन्दा कम छैन । तर, चलचित्र परम्परागत बनाउनुहुन्छ भन्ने आरोप छ नि ?
कुनै पनि चलचित्र बनाउनु भन्दा पहिला म आफ्नै मनलाई सोध्छु, यो चलचित्र ठिक छ कि छैन । मलाई ठिक लाग्यो भने बनाउँछु । त्यसरि बनाउदा कतिपय चलचित्र चल्छ त कतिपय नचल्न पनि सक्छ । चलचित्र चलेन भन्दैमा म असाध्यै परम्परागत भन्ने होइन ।

५.कोहिनुर सर्वाधिक चल्यो । उक्त चलचित्र चल्नुमा तपाइको सिर्जना भन्दा श्रीकृष्ण श्रेष्ठप्रतिको सम्मान धेरै थियो भन्छन् ? तर, तपाई भने चलचित्र मेरै कारण चल्यो भन्नुहुन्छ ?
‘कोहिनुर’ चल्नुमा श्रीकृष्णजीको प्रभाव पनि हो म मान्छु । तर, चलचित्र गतिलो थिएन भने दर्शकहरु दोहोर्‍याई तेहेर्‍याई आउने थिएनन् । कतिपय कहिल्यै नेपाली चलचित्र नहेर्ने दर्शक पनि आए । मोफसलमा बन्द भएका कतिपय हल ‘कोहिनुर’ले खुलायो ।