जोरपाटी-सुन्दरीजल सडकखण्ड विस्तारमा बाधा पुर्‍याउने खोज्ने पूर्वसिडिओ गीताप्रसाद खनालसहित ४० जनालाई प्रहरीले नियन्त्रणमा लिएको छ । आइतबार बिहान पक्राउ परेका उनीहरुलाई गौशाला प्रहरी कार्यालयमा राखिएको छ ।आइतबार बिहान सडक विस्तारको विरोध गर्दै सडकमा प्रदर्शन गर्न थालेपछि पूर्वसिडियोसहित स्थानीयबासी पक्राउ परेका हुन् ।

पक्राऊ पर्ने पूर्वसहसचिव गीताप्रसाद खनाल अख्तियार दुरुपयोग अनुसन्धान आयोगका पूर्वकर्मचारी समेत हुन् । खनाल डडेलधुरा, स्याङ्जा, गुल्मी र बजाङमा सिडिओ बनिसकेका व्यक्ति हुन् ।

जोरपाटीदेखि सुन्दरीजलसम्म सडक विस्तार गर्दा ८ सय ७१ वटा घरको केही भाग भत्कने भएपछि पूर्वसिडियोको नेतृत्वमा स्थानीयवासी आन्दोलनमा उत्रिएका हुन् । आइतबार बिहानै जोरपाटीमा पूर्वसिडिओ खनालको नेतृत्वमा सडक विस्तार प्रक्रियाविरुद्ध उनीहरुले प्रदर्शन गरेका थिए ।

आफूहरुले चलनचल्तीको मूल्य बराबर घरको क्षतिपूर्ती र जग्गाको मुआब्जा नपाएसम्म सडक विस्तार हुन नदिने भन्दै करिब २ सय जना स्थानीयबासीहरु प्रदर्शनमा उत्रिएका थिए ।

उक्त क्षेत्रमा प्रतिआना १५ देखि ४० लाख रुपैयाँमा बिक्री जग्गाको कारोबार भइरहेको छ ।

पक्राउ परेका पूर्वसिडियो गीताप्रसादले अनलाइनखबरसँग भने- ‘तलन चल्तीको भाऊमा मुआब्जा नपाएसम्म हामी घर भत्काउन दिँदैनौं ।’

उनले त्यहाँ बाटो विस्तार नगर्नू भने सर्वोच्च अदालतले समेत आदेश दिइसकेको बताए । आफूहरुले शान्तिपूर्ण रुपमा माग राख्दा प्रहरीले थुनेको उनले गुनासो पोखे ।